一个老人讲格南汇闲话侬听得懂伐？

上海姚良官

伲屋里厢登拉南汇东爿爿一个宅浪响，家东头有拾许棵白眼树，门前头有条河浜，浜海边种仔交关小菜，有落苏、洋山芋、饭瓜、寒豆拉啥，什在吃勿脱，奈末叫五伲格男将，勒拉早晨头踏仔脚踏车咾到镇浪厢去卖，寻俩个小铜钿蛮好格，，手头总管活落一眼，啊实加是买起末事来肉麻来，实哪搿排后生家是手豪阔勒，啥叫啥一段段路末啊要乘叉头，吃顿饭末板要到饭馆里去，奈叫话话个，怪是啊怪勿得伊拉，现在工钿比前头大脱杭尽拉哉，伲小喊里时，粥啊勿着杠，真是苦来咾眼泪汤汤点，喔唷，老里八早格事体勿要话哉，迭抢大家开心来，伲乡下种田人格日脚过勒脱镇浪人差不多合在，五子要讨娘子哉，囡末要拨出去哉，小外孙末要到学堂里读书去哉，狄两聂是伲大大阿奶送伊去格，狄个小囡倒蛮识货格，看见先生就鞠仔个躬，边头个人笑勒什加眼乌啊要汆出来哉，一歇歇末，一部小包车停拉伲脚跟头，车子浪走落来一个囡男头，啥末事，是伲格阿侄末，狄个囡晓得五勒拉迪掰掰，加老开仔车子接伲回转去，狄个辰光，已经日中心里哉，肚皮有眼饿啊哉，奈末伲几家头就到马路对过格小店里去吃仔几碗面，又吃仔几根油石管，伲老人出去白相总管做人家来，迭趟啊不过吃脱啥四十元，拨勒老板一张五十元头，找出来侪是铅角子。就梗，放拉拎包里算勒，加能样子末总算止止饿，啊实加是饿勒臭老死，吃仔饭末顺带便到街路里白相一转，冷陌省头里听见呯！嘭！勿壳落是一爿店新开张，勒拉放高升搭仔放黄鞭高升，伲几家头走过去忙忙看，是买衣裳格，价钿一眼啊勿糨，话咾一件薄来希格领衣啊要卖头两百元，勒拉捣浆糊，狄格辰光，手机响哉，是新妇打来格，讲屋里厢亲眷来哉，叫五哪豪速回转去，伲到小山店里买瓶烧酒，再买眼长生果、西瓜子、水果糖拉啥，再到小菜场里去买啥四条梅鲤搭仔省五包细粉，买好末事要想回转去勒末，巧勒斜巧，能好勒拉街路里碰着隔壁头格婶妈，问伊到合答去，实伊话，狄两日上不上，发寒热咾肚皮惹，肚皮里也不适意，五脱伊讲，实侬熬勿得格，快一眼到医院里去看毛病，后头来，是伲一部小包车送伊到医院去格。